Hinay-hinay nga miubos ang Creamline Cool Smashers sa sunod-sunod nga mga komperensya sa Premier Volleyball League, human sa sunud-sunod nga mga kampiyonato.
Determinado si team captain Alyssa Valdez, nga ibalik ang Cool Smashers sa ibabaw sa podium sa dihang ipadayon na ang aksyon sa PVL Reinforced Conference karong Martes.
Ang Cool Smashers nakadaog og upat ka sunodsunod nga kampiyonato, sukad sa All-Filipino Conference niadtong 2023. Gisundan kini sa laing kampiyonato sa 2024 All-Filipino Conference, 2024 Reinforced Conference ug 2024 Invitational Conference.
Naputol ang sunodsunod nga kadaogan sa Cool Smashers, dihang ilang nakuha ang runner-up trophy sa 2025 All-Filipino Conference human napildi sa Petro Gazz sa finals. Nius-os pa ang posisyon sa Creamline, dihang nahuman kini isip bronze medalists sa 2025 PVL On Tour ug 2025 Invitational Conference.
Matod ni Valdez, usa kini ka maayong kasinatian alang kanila aron ilang bawion ang winning formula. Dakong tabang ang pagbalik nila ni MVP Tots Carlos ug middle blocker Bea De Leon, nga wala nakita sa miaging conference.
Dako usab og tabang ang pagsulod sa American outside hitter nga si Courtney Schwan, kinsa magsilbing import sa Cool Smashers. Si Schwan adunay daghang kasinatian asa nakadula kini sa mga liga sa France, Italy, ug Greece.
Photo Courtesy to:One Sports
