Gisaulog ang World Teachers’ Day, sa mga magtutudlo pinaagi sa usa ka lihok-protesta nga gitawag og “Teachers, Walk Out!”. Nagpundok ang mga magtutudlo sa University of Santo Tomas-España ug nagmartsa padulong sa Mendiola diin nagpahigayon sila og mubo nga programa.
Ang ilang panawagan: P50,000 nga sweldo alang sa Teacher I, dugang pundo (budget) sa edukasyon, ug paninglan sa responsibilidad ang mga kurakot (tiwali) nga opisyal.
Bisan pa sa kusog nga ulan, wala kini nakapugong sa lihok-protesta.Miresulta kini og kahuot gamay sa trapiko sa tibuok España Boulevard, apan pagkahuman sa programa ug ilang pagrally sa Mendiola, malinawon nga namauli ang mga magtutudlo.
Nagpabilin ang mga pulis aron mohatag og seguridad ug maseguro ang kahapsay sa lugar. Samtang, dili lang sa Manila gipahigayon ang paglihok kondili apil na sa pipila ka eskwelahan sa Quezon City diin nigawas usab ang mga magtutudlo, naggamit og visual aids, mga plakard ug uban pang mga kalihukan isip simbolikong pagsupak.
Panawagan sa mga magtutudlo: dili selebrasyon, kundili paningil sa hustisya ug makahuluganon nga reporma sa edukasyon.
Photo courtesy: Altermidya
