Gihimakak ni Senador Mark Villar ang mga pasangil bahin sa iyang kalambigitan sa kontraktor nga gihatagan og mga proyekto sa Las Piñas.
Base sa impormasyon, ang contractor nga ni-secure og mga proyekto alang sa ilang syudad giingong first cousin ni Senador Villar.
Gibana-bana nga mokabat sa kapin sa P18.5B ang mga infrastructure projects, nga giingong nakuha sa kontraktor nga nalambigit sa senador.
Gipasabot sa senador, nga wala siyay direkta o dili direkta nga pagpanag-iya o kontrol sa bisan unsang kompanya nga nisalmot sa mga proyekto sa Department of Public Works and Highways (DPWH).
Matod niya, ang mga opisyal nga rekord mokompirmar nga walay bisan usa sa iyang mga kabanay ang nakakuha og kontrata gikan sa 2016 hangtod 2021 dihang naglingkod siya isip DPWH Secretary.
Dugang pa, ang nag-unang tumong niya niadto mao ang pagpatuman sa lawom ug komprehensibo nga mga reporma ug pagtukod pag-usab sa pagsalig sa publiko sa DPWH.
Nisaad ang senador nga di siya moatras sa bisan unsang imbestigasyon kay matod pa wa siyay gitagoan. Gisuportahan usab niini ang imbestigasyon sa Independent Commission for Infrastructure (ICI).
Photo Courtesy to: PNA
