Narekober sa Philippine Coast Guard (PCG) ang usa ka gidudahang underwater drone nga adunay marka nga Chinese human kini nadiskubrehan sa mga mananagat sa Linapacan, Palawan.
Matod sa PCG, nakit-an sa mga mananagat sa Sitio Tapic, Barangay New Colaylayan ang 12-foot device niadtong Dominggo samtang nanagat duol sa Barangonan Island.
Ila kining gi-turn over sa Coast Guard hinungdan nga gidala dayon kini sa PCG Station Linapacan alang sa eksaminasyon sa law enforcement agency.
Ang inisyal nga inspeksyon nagpadayag sa usa ka conductivity-temperature-depth sensor nga adunay mga marka sa Chinese ug serial number.
Matod sa tigpamaba sa PCG alang sa West Philippine Sea Commodore Jay Tarriela, ang device nahimutang sa lig-on nga metal frame ug susama sa autonomous underwater vehicles o underwater drones nga gigamit sa oceanographic surveys ug posibleng surveillance.
Si PCG Commandant Admiral Ronnie Gil Gavan miingon nga ang insidente usa ka pahinumdom sa panginahanglan sa komunidad ug nasudnong kooperasyon aron mapugngan ang dili awtorisado nga mga kalihokan sa atong kadagatan. Gidayeg usab niya ang mga mangingisda sa dali nga pagreport sa aparato.
Sa laing bahin, ang bag-ong na-recover nga device gipa-ubos sa forensic tests aron mahibaw-an ang tinuod nga gigikanan niini ug matino kung kini ba ang hulga sa nasudnong seguridad.
Nanawagan ang PCG sa publiko nga i-report dayon ang mga kadudahang butang nga makita sa dagat ngadto sa pinakaduol nga Coast Guard station
Photo Courtesy to:tiktok
