Nakumpiska sa Police Regional Office 10 (PRO10) ang gibanabanang dol-an usa ka milyon nga kantidad sa mineral ores sa Opol, Misamis Oriental niadtong nakalabay nga adlaw.
Gibutyag sa kapulisan nga miresponde ang mga personahe sa Opol Municipal Police Station (MPS), human makadawat sa report gikan sa confidential informant bahin sa giingong illegal mining operations sa Sitio Tanawon, Brgy. Limonda, Opol sa nahisgutang probinsya.
Sa pag-abot sa lugar, nadiskubrehan sa operating team ang saysentos baynte singko (625) ka sako sa mineral ores nga gituohang ilegal nga nakuha.
Tungod sa kakuwang sa transportasyon, ang mga nakumpiska nga mineral ores pabiling gibantayan sa dapit samtang nagpaabot sa tukmang turnover sa mga hingtungdan nga ahensya sa gobyerno alang sa disposisyon.
Ang kapulisan padayon pa nga nagpahigayon og follow-up operations sa pag-ila sa mga responsable nga nagpaluyo sa ilegal nga kalihokan, nga usa ka paglapas sa Republic Act 7942, o nailhan nga Philippine Mining Act of 1995.
Lambigit niini nga balita, strikto nga gaimplementar na sa Provincial Government sa Misamis Oriental, MGB ug ubang govt agencies ang Ceast and Desist Order sa mining operations sa Opol.
Gikabutyag pa ni Acting Provincial Director PCol Al Abanales sa MisOr Provincial Police Office nga gipatuman nila ang order sa Mines and Geosciences Bureau 10 ang Cease and Desist Order sa gatusan ka mining tunnels sa Limonda Opol apan maka padayon lang sila sa pag mina kung matuman na ang Minahan ng Bayan.
