Gitakda imbitahan sa Senate Blue Ribbon Committee sila kanhi House Speaker Martin Romualdez ug ex-congressman Elizadly Co nga mopatim-aw sa sunod nga pagdungog.
Si Senate President Pro Tempore Panfilo Lacson, chairman sa komite, niingon nga kini aron maklaro ang panglantaw sa pipila ka sektor nga ang Blue Ribbon biased, pabor o protektahan ang pipila ka personalidad.
Gipasabot ni Lacson nga sa kaso ni Co, magpadala og invitation letter sa iyang address apan tungod kay tua siya sa gawas sa nasud, dili gyud siya motunga, busa padad-an og subpoena.
Kon dili gihapon mopatim-aw ang kanhi kongresista, padad-an siya og show cause order ug mahimo siyang i-contempt, diin ma-isyuhan siya og warrant of arrest kon mapakyas siya sa pagtambong.
Samtang alang kang Romualdez, ang iyang imbitasyon iduso ngadto kang House Speaker Faustino Dy III isip pagrespeto sa inter-parliamentary courtesy tali sa duha ka balay sa Kongreso.
Sa pagkakaron, si Lacson niingon nga nagpaabot pa ang komite sa pipila ka kalambuan sa kaso sa dili pa itakda ang sunod nga pagdungog
Giklaro usab ni Lacson nga ipadayon sa Blue Ribbon ang mga hearing basta adunay bag-ong importanteng panghitabo nga kinahanglang tan-awon ug ipabilin niya ang gitawag nga blindfold mentality nga nagpasabot nga patas siya ug mosunod kon asa paingon ang ebidensya.
via: POLITIKO
