Mokabat na sa 19 ang ihap sa mga namatay samtang 21 pa ang gilista nga nawawala human sa kusog nga pagkuso-kuso sa Bagyong Bualoi nga miigo sa norteng bahin sa Vietnam niadtong Lunes, Septiyembre 29.
Matod sa gobyerno sa Vietnam, ang bagyo nagdala ug kusog nga uwan nga miresulta sa grabe nga pagbaha ug landslide, hinungdan nga gitawag kini nga pinakakusog nga bagyo nga miagi sa nasud karong tuiga.
Dunay 88 ka tawo ang nasamdan, samtang kapin 100,000 ka balay ang nakasinati ug gagmay nga kadaot.
Gibanabana usab nga 10,000 ka ektarya sa mga uma ug humayan ang gilunopan gihapon sa tubig.
Base sa report sa Vietnam weather agency, milapas na sa 300mm ang uwan sa pipila ka lugar ug nagpagawas kini ug pasidaan sa posibleng landslide ug flash flood sulod sa unom ka oras.
Hangtod karon, nagpabilin nga nalunopan ang ubang bahin sa amihanang Vietnam, diin sirado ang daghang kalsada ug naputol gihapon ang suplay sa kuryente sa daghang komunidad
Photo Courtesy to:youtube/f
