Gidepensahan sa Department of Foreign Affairs (DFA) ang pagbisita sa mga opisyal sa Philippine Embassy sa detention facility ni kanhi presidente Rodrigo Duterte sa The Hague.
Matud sa DFA, kini usa ka normal nga gimbuhaton aron maprotektahan ang kaayohan ug katungod sa mga Pilipino nga napriso sa gawas sa nasud, subay sa Vienna Convention on Consular Relations ug balaod sa Pilipinas.
Niadtong Miyerkules, gisaway si Vice President Sara Duterte nga giingong nagpakaaron-ingnon og welfare check ang mga opisyal ug nagtumong sa pag-report ngadto ni Presidente Ferdinand Marcos Jr. Gitawag niya kini nga abuso sa lagda sa detention unit sa International Criminal Court (ICC).
Mitubag ang DFA nga sama ra kini sa ilang ginabuhat sa ubang Pilipino nga napriso sa abroad. Apan ang kampo sa depensa ni Duterte, pinaagi sa abogado nga si Nicholas Kaufman, miingon nga nakapahadlok ang maong bisita kay nahitabo kini pagkahuman nila mosang-at og hangyo sa ICC nga undangon ang trial tungod sa mental condition sa kanhi presidente.
Si Kaufman nagduda nga gituyo ang pagbisita aron makakuha og impormasyon bahin sa kahimtang medikal ni Duterte.
Giingon pa niya nga kung tinuod nga walay laing tuyo ang maong bisita ug usa ra gyud kini ka ordinaryong welfare check, ang Philippine Embassy kinahanglan ipagawas ang tibuok report aron makita sa tanan ang sulod niini ug mapamatud-an nga walay tinago o laing agenda ang mga opisyal.
SOURCE: THE MANILA TIMES
