Nanawagan si Palestinian President Mahmoud Abbas alang sa hingpit nga pagtapos sa giyera sa Gaza. Sa iyang video message ngadto sa United Nations General Assembly (UNGA), importante matud pa nga magtinabangay ang mga nasud aron mahunong na ang gihimong genocide sa Israel. Dugang pa niya, kini nagpahinabo og kagutom, ug pagkawala sa mga pinuy-anan sa mga Palestino sa Gaza.
Gipamugos ni Abbas nga walay hustisya kon dili mahigawas ang mga Palestino. Andam siya nga makigtambayayong sa US, Saudi Arabia, France, ug UN aron mapatuman ang peace plan sa Gaza.
Mahinumdoman nga niadtong miaging semana, gi-endorso sa 193 ka miyembro sa UN General Assembly ang pito ka pahina nga declaration nga nagtumong nga makab-ot ang two-state solution alang sa Israel ug Palestinian, ug aron tapuson na ang giyera tali sa Israel ug Hamas sa Gaza.
Giklaro ni Abbas nga walay bisan unsang papel ang Hamas sa pagpangulo, diin kinahanglan nilang isurender ang ilang mga armas ngadto sa Palestinian authorities.
Nahinumduman usab nga nag-video message na lang ang Palestinian leader human gibalibaran ni US President Donald Trump ang mga lider sa Palestine sa ilang US Visa aron unta makatambong sa tinuig nga UN summit sa New York.
Photo courtesy: Al Jazeera
