Malipayong gidawat ni House Deputy Minority Leader Leila M. de Lima sa Mamamayang Liberal (ML) Partylist ang pormal nga pagsang-at sa kaso sa International Criminal Court (ICC) batok kang kanhi Presidente Rodrigo Duterte nga may kalabot sa “crimes against humanity” labot na sa daghang pagpamatay (murder).
Matod ni De Lima, kini nga lakang usa ka mahinungdanong lakang sa pagpangita og hustisya para sa mga biktima sa Davao Death Squad (DDS) ug sa “national network” sa mga death squad nga giingong gitukod ug gipangulohan ni Duterte sa dihang siya pa ang mayor sa Davao ug presidente sa nasud.
Gipasiugda ni De Lima nga dugay na nga gisugdan sa ICC ang proseso sa hustisya, sukad pa niadtong 2018, sa dihang gipahibalo sa Office of the Prosecutor (OTP) ang preliminary examination sa mga pagpatay ubos sa kampanya batok sa droga.
Dugang pa sa kongresista, dili kuwang ang mga pahimangno ni Duterte gikan sa mga tagasuporta sa tawhanong katungod dinhi sa Pilipinas. Matod niya, gipili ni Duterte nga pasagdan kini, ug karon, atubangon niya ang sangputanan sa iyang mga binuhatan.
Photo courtesy to: Wikipedia Commons
