Arestadoang usa ka membro sa Citizen Armed Forces Geographical Unit tungod sa alegasyon nga pagpanglugos og menor de edad sa Kamang, Brgy. Albor Libjo, Dinagat Islands, niadtong nakalabay nga adlaw.
Sa imbestigasyon sa kapulisan, ang biktima nagpangedaron og 13 anyos nga babaye, samtang ang suspek nailhan nga Alyas “Jer”, 23 anyos, ulitawo, CAFGU ug residente sa Brgy. San Antonio, San Jose, Dinagat Islands.
Gikatahong ang suspek uyoan sa biktima. Nasayran sa mga kapulisan nga ang biktima samtang didto pa siya sa Surigao City, ang suspek maoy nagpadala kaniya og five hundred fifty pesos (Php550.00) aron ibayad sa iyang pamasahe padung sa Albor.
Gipadayag sa biktima sa mga kapulisan nga daghang higayon na siya napahimuslan sa iyang uyoan sukad niadtong Hunyo 2025.
Dugang pa, gibutyag pa sa biktima nga ang suspek nanglugos sa iyang magulang nga babaye sa makadaghang higayon kaniadto. Ang magulang nga babaye, nga 16 anyos na karon, gikatahong gilugos niadtong 14 anyos pa.
Anaa na karon sa kustodiya sa Libjo Municipal Police Station ang suspek ug gipasakaan na sa tukmang kaso og walay girekomendar nga piyansa.
Photo for illustration credits to:Dainik Bhaskar
