Gipahibalo sa PAGASA nga padayon nga nakaapekto ang Southwest Monsoon sa Davao Region samtang nagpabilin ang Super Typhoon “Nando” o Ragasa sa parte sa Luzon.
Base sa pinakabag-ong update alas 3:00 sa kadlawon, kini naa sa 240 kilometro kasadpan sa Calayan, Cagayan nga adunay kusog nga hangin nga 185 kilometros matag oras ug hangin nga mopaspas hangtod 230 kilometros matag oras.
Sa Davao Region, masinati ang panalagsang pagdag-um sa kalangitan inubanan sa patak-patak nga pag-ulan, kilat ug pagpanalugdug. Posible ang pagbaha ug pagdahili sa yuta kon adunay masinati nga grabe nga thunderstorm. Kasarangan nga hangin gikan sa Habagatan-Kasadpan ang mopatigbabaw ug kasarangan sab ang pagbalud sa dagat nga moabot gikan 0.6 hangtod 2.5 metros.
Sa Davao City, ang temperatura karong adlawa mokabat gikan 25 hangtod 34 degrees Celsius, samtang ang pagsidlak sa adlaw alas 5:31 sa buntag ug ang pagsalop alas 5:37 sa hapon.
SOURCE: PAG-ASA DAVAO
