Gituki pag-ayo atol sa panagtapok sa nilabayng semana sa Committee on Economic Enterprises ang sugyot nga pag-abli og balik sa eastbound terminal sa Barangay Gusa sa dakbayan.
Gipunting ni Konsehal Edgar Cabanlas kinsa nangulo sa komitiba nga kinahanglang ang mga provincial public utility jeepneys kon puj obligahon nga sa paggamit sa Eastbound Terminal imbes nga mulahos sa Market City Terminal diha sa Agora, Barangay Lapasan.
Ginalantaw kini nga lakang nga makatabang diha sa nagkagrabe nga problema sa trapiko dinhi sa dakbayan nga angayan ng mahatagan og kasulbaran.
Girekomenda sab sa CEEBDA nga labing gikinahanglan nga magpatuman og assessment sa pasilidad sa Eastbound Terminal ayha kini ablihan lakip na ang pagtino kakulangan sa pasilidad ug mga gikinahanglan ayuhon. Gisugyot sab nila ang phase-by-phase nga pamaagi sa pagpatuman sa nahisgutang lakang.
Una ng nag-inspeksyon ug mibisita sa nahisgutang terminal ang konsehal kung asa naobserbahan niini ang problema sa illegal parking, kuwang sa maintenance sa palibot apan ang administrative building, nagpabilin pang intact.
Giuyunan sab sa komitiba nga susihon ang terminal ug magpahigayon og public hearing uban sa hingtungdang stakeholders, lakip na mga transport operators, federation presidents ug uban pa.
Photo courtesy: City Council
