Gipagawas na sa International Criminal Court (ICC) Office of the Prosecutor ang dokumento nga naglangkob sa mga kaso batok kang kanhi Presidente Rodrigo Duterte.
Ang maong dokumento, nga gitawag og Document Containing of the Charges (DCC), gihatag ngadto sa Pre-Trial Chamber aron mahimong basihan sa confirmation of charges hearing.
Base sa pamahayag sa mga prosecutors, gipasanginlan si Duterte sa mosunod nga mga kaso:
- Murder isip crime against humanity sa Davao City atol sa iyang pagka-alkalde gikan 2013 hangtod 2016.
- Murder isip crime against humanity batok sa mga “high value targets” sa lain-laing lugar sa Pilipinas sa panahon sa iyang pagka-pangulo niadtong 2016 hangtod 2017.
- Murder ug attempted murder isip crimes against humanity sa barangay clearance operations sa lain-laing bahin sa nasud gikan 2016 hangtod 2018.
Gipakita usab sa dokumento nga adunay 49 ka insidente nga gisumiter isip ebidensya, diin adunay 78 ka biktima tanan: 19 alang sa count 1, 14 alang sa count 2 ug 45 alang sa count 3.
Sumala sa mga prosecutors, si Duterte mismo ang giila nga responsable sa mga maong krimen pinaagi sa paglaan og pondo ug pagtudlo sa mga tawo aron ipatuman ang iyang kampanya sa “war on drugs.”
Gawas sa DCC, gipagawas sab sa prosecution ang Pre-Confirmation Brief nga naglatid sa mas detalyado nga mga ebidensya ug argumento nga nagpalig-on sa kaso batok sa dating pangulo.
Hinumduman nga nakatakda untang isugdan karong adlawa, Setyembre 23, 2025 ang confirmation of charges hearing. Apan kini gipospone tungod kay ang kampo sa depensa mipasabot nga adunay isyu sa kahimsog si Duterte, diin giingon nga kini naglisod og hinumdum sa panghitabo ug nagsugod na sab og pagkaulyanin.
Photo courtesy: International Criminal Court
