Nagtrabaho isip usa ka “ceremonialist /organizer” sa Brazil ang 60-anyos nga si Baltazar Lemos. Tungod sa iyang trabaho, daghan na siyang na-organisa nga kasal, bunyag, ug lubong. Human siya makapahigayon og usa ka lubong nga gidagsa sa kapin 500 ka tawo, nagsugod siya og hunahuna kung pila pud kaha ang motambong kung siya na ang ilubong.
Aron masayran kung unsa siya kamahinungdanon sa mga tawo nga iyang kaila, nag-post siya sa iyang Facebook og peke nga balita nga nagsulti nga gidala siya sa Albert Einstein Hospital sa São Paulo ug namatay didto. Daghan ang nasorpresa ug naghatag dayon og simpatiya sa comment section. Sunod niya nga gipost mao ang petsa ug lugar kun asa himuon ang lubong ni Lemos.
Daghan ang nitambong sa haya sa usa ka chapel sa lungsod sa Curitiba. Samtang nagpadayon ang seremonya ug ang mga bisita naghilak, kalit lang nga nitunga si Lemos sa altar ug nagpanghimatuod nga buhi pa siya usa lang daw kini ka “eksperimento” aron makita kun kinsa ang motambong sa iyang lubong.
Gikasuko sa mga tawo ang iyang gibuhat ug daghan ang misibat sa chapel nga nasuko. Nagviral ang balita sa tibuok Brazil ug nakaabot pa sa national news.
Sa interbyu sa mga news agency, nasayran nga wala’y nahibalo, bisan iyang pamilya, kabahin sa iyang “eksperimento.”
Bisan pa nga nangayo siya og pasaylo, nagpadayon gihapon ang kasuko sa uban niyang paryente labi na sa kahimtang sa iyang 80-anyos nga inahan nga posible unta giatake sa kasingkasing tungod sa pekeng kamatayon sa iyang anak.
Nag-viral sa social media ang iyang binuang ug karon, gibatikos siya og maayo sa mga netizens. Daghan ang nagaingon nga basin sa tinuod niyang kamatayon, wala na gyud motambong sa iyang lubong.
Photo courtesy to: KOHA
