Gipahibalo ni U.S. President Donald Trump nga subling maglusad ang military ug airstrike sa batok sa gikatahapang sakayan nga gipanag-iyahan sa Venezuelan drug cartel nga paingon sa Estados Unidos.
Matud ni Trump, tulo ka tawo ang namatay sa operasyon gawas sa teritoryo sa America diin nakita matud pa sa kadagatan ang dagkong mga bag nga gituohang may sulod nga cocaine, fentanyl o shabu.
Kalabutan niini, Niadtong Setyembre 2 usa ka samang operasyon ang gipahigayon batok sa usa pa ka sakayan nga gituohang konektado sa Tren De Aragua, nailang Venezuelan gang.
Miabot sa 11 ang namatay sa gihimong operasyon sa US. Nagpakatag na usab ang Estados Unidos sa mga kasundaluhan sa US Caribbean kalakip ang pagbutang sa F-35 fighter jets, pito ka warships, ug usa ka nuclear-powered submarine.
Samtang, gitawag sab ni Venezuelan President Nicolás Maduro nga panggubot lang ang gihimo sa America. Gibusisi sa mga eksperto ang legalidad sa mga airstrike ilabina nga walay pahintulot gikan sa US Congress ang sama nga operasyon.
Photo courtesy to:CBS News
