Gibutyag ni Department of Justice (DOJ) Secretary Jesus Crispin Remulla nga aduna nay dokumentadong tulo (3) ka flood control project nga may kalambigitan sa anomalya, base sa imbestigasyon sa National Bureau of Investigation (NBI).
Sa usa ka pamahayag, giingon sa kalihim nga kabahin kini sa report nga gihatag kaniya sa NBI,human niya gisugo ang maong ahensya sa paghimo sa ilang kaugalingong imbestigasyon may kalabotan sa flood control crisis.
Hinoon wala pa gibutyag sa kalihim ang tibuok detalye sa imbestigasyon ug sa mga anomalya nga ilang nadokumento, iyang giingon nga adunay panagkunsabo nga nahitabo tali sa pipila ka mga opisyal nga nalambigit sa maong mga proyekto.
Wala usab niya hinganli kung si kinsa ang maong mga opisyal nga nalambigit, apan iyang gisiguro nga dili kini tabunan sa tanang bahin sa imbestigasyon hangtod sa mismong pagpasaka sa kaso.
Gisiguro sa kalihim nga bisan pa man adunay dakong posibilidad nga may mga opisyal gikan sa legislative ug executive branch nga posibleng nalambigit sa mga maanomalyang proyekto, buhian sa DOJ ang kumpletong resulta sa imbestigasyon hangtod sa pagpasaka sa kaso batok sa mga responsable.
Kung balikan ang miaging pamahayag ni NBI Director Jaime Santiago, iyang gimandoan ang matag regional director sa ilang buhatan nga magsugod og kaugalingong assessment sa mga flood control infrastructure nga gituohang aduna’y kalambigitan sa anomalya.
Gisugdan sa NBI ang ilang imbestigasyon sa mga flood control infrastructure nga unang gibisita ni President Ferdinand Marcos Jr.
Photo courtesy of newsinfo.inquirer.net
