Gisentensiyahan sa Korte Suprema sa Brazil ang kanhing presidente nga si Jair Bolsonaro, og 27 ka tuig ug 3 ka bulan nga pagkakulong, human mapamatud-an nga sad-an sa pagsulay nga magpabilin sa gahum pinaagi sa usa ka kudeta pagkahuman napildi sa 2022 nga eleksyon.
Nibotar pabor sa hukom ang upat sa lima ka mga mahistrado. Sumala ni Justice Cármen Lúcia, nga si Bolsonaro ang nanguna ug tigpasiugda sa usa ka organisado nga pagsulay sa pagpukan sa demokratikong sistema sa nasud. Si Bolsonaro karon ubos sa house arrest sa Brasília ug mahimong mag-apelar sa Korte Suprema sa Brazil.
Samtang, kusganong gikondena ni US President Donald Trump ang hukom, samtang nagpadayon ang mga protesta sa mga tagasuporta ni Bolsonaro. Kini ang unang higayon nga ang kanhi presidente sa Brazil nakonbikto sa usa ka pagsulay sa kudeta.
Bisan pa sa mga pasangil nga iyang giatubang, nagpabilin siyang impluwensyadong tawo, ug gipaabot nga ipahibalo ang mopuli nga kandidato sa eleksyon batok sa kasamtangang presidente nga si Luiz Inacio Lula da Silva sa mosunod nga tuig.
Photo courtesy to:BBC
