Gianunsyo sa Estados Unidos ang paghatag ug dugang $250M o anaa sa gibanabanang P13.8B nga hinabang pinansyal sa Pilipinas.
Tumong sa pundo, mao ang pagpalig-on sa mga serbisyo sa panglawas sa nasud, lakip ang pagpugong sa tuberculosis, pagpalambo sa kahimsog ug nutrisyon sa bata, ug pagpalapad sa serbisyo sa kahimsog sa pangisip.
Sumala sa Departamento sa Estado sa US, kini usa ka bahin sa nagpadayon nga kooperasyon tali sa duha nga mga nasud aron matubag ang mga hagit sa panglawas sa publiko.
Niining bahina, ang mga proyekto nga gikonsiderar nga prayoridad pagadumalahon sa US Embassy Foreign Assistance Section, ug magpunting sa supply chain management, data systems, ug ang rehabilitasyon sa mga laboratoryo sa nasud.
Ang bag-ong tabang nunot sa miaging P3B nga gipahibalo usab sa Estados Unidos, human sa panagtagbo nila ni US President Donald Trump ug President Ferdinand Marcos Jr. sa White House niadtong Hulyo, nga gigahin alang sa kalig-on sa sektor sa enerhiya, sa Luzon Economic Corridor, ug pagpalig-on sa depensa sa militar sa Pilipinas.
Sa kinatibuk-an, niabot na og kapin sa P17B ang hinabang nga gihatag sa Estados Unidos sa Pilipinas karong tuiga.
Photo courtesy to:RVTM
