Nanawagan si City Councilor Yevonna Yacine B. Emano nga ipasar ang usa ka Centenarian Ordinance sa Cagayan de Oro, nga iyang gihulagway isip “legacy law” sa 21st City Council.
Gipunting ni Emano nga samtang nakadawat na og P100,000 ang mga centenarian ubos sa Republic Act 10868 o ang Centenarians Act of 2016, nga gipalapdan sa 2024, ug gisuportahan sa lokal nga gobyerno, ang siyudad kulang gihapon og ordinansa nga mogarantiya og permanenteng alokasyon sa budget alang sa programa.
Sa gisugyot nga ordinansa, nagtumong sa pag-institutionalize sa matag tuig nga pondo alang sa mga insentibo sa mga centenarian, pagsiguro sa tukmang koordinasyon tali sa City Social Welfare and Development (CSWD), sa Office for Senior Citizens Affairs (OSCA), ug mga barangay, ug pagpalapad sa pag-ila bisan sa mga centenarian nga mipanaw na pinaagi sa posthumous plaques of honor.
Gipasiugda ni Emano ang legal ug sosyal nga importansya niini nga lakang. Subay sa konstitusyon angay nga protektahan ang mga tigulang ubos sa 1987 constitution ug uban pang nasudnong mandato nga nagmando sa mga LGU sa pagpasidungog sa mga tigulang.
Giawhag usab niini ang mga pamilya ug komunidad nga magpadayon sa pagmahal sa mga tigulang ug pagpasidungog sa dignidad ug kaalam sa mga nag-una kanato.
Ang sugyot gi-refer sa mga komite sa senior citizens, social services, ug finance, budget and appropriations alang sa tukmang aksyon.
Photo courtesy: Cagayan de Oro City Council
