Napalgan sa mga Barangay Peace Keeping Action Team kon BPAT sa Barangay Linangkob, Kidapawan City ang bricks sa gitouhang pinaugang dahon sa Marijuana, atubangan sa Linangkob National High School, kadlawon niadtong Agosto 10, 2025.
Sumala pa ni Barangay Chairman Erwin Pamat, nagpahigayon og roving ang iyang mga BPAT dihang namatikdan ang giabandonang cartoon, hinungdan nga ila kining gisusi ug nagtuo sila nga fetus o bata ang sulod sa naasoy nga butang.
Nakurat na lamang ang mga BPAT dihang 10 ka bloke sa gitouhang ilegal nga droga ang ilang nakit-an, hinungdan nga dali kining gi-report sa Kapitan ngadto sa kapulisan.
Matod pa ni PLTCOL Dominador Palgan Jr. ang Chief of Police sa Kidapawan City Police Station, anaa sa 10 ka kilo ug nagkantidad sa P200K ang nakit-ang ilegal nga droga.
Gina-imbestigahan na usab sa otoridad, ang courier company nga gisudlan sa maong marijuana.Panawagan ni Palgan, nga mahimong vigilante sa palibot ug i-report dayon kanila ang kadudahang butang aron dali kining maaksyonan.
Photo Courtesy: Kapitan Erwin Pamat
