Miabot na sa China ang lider sa North Korea nga si Kim Jong Un uban ang iyang anak nga si Kim Jue Ae, kinsa giingong mahimong mopuli kaniya sa umaabot.
Gipahibalo nga motambong si Kim sa Victory Day parade nga nagtimaan sa ika-80 anibersaryo sa pagtapos sa World War II.
Kauban sa maong kalihokan, ang daghang mga lider sa kalibutan, lakip na si Russian President Vladimir Putin, ug mga lider sa Iran, Myanmar, Cuba ug uban pang mga nasud.
Gisugat si Kim Jong Un sa Chinese Foreign Minister nga si Wang Yi sa iyang pag-abot pinaagi sa bullet-proof nga tren.
Kini usa ka pormal nga pagpadayag sa padayon nga alyansa sa duha ka nasud. Kahibaloan nga katapusang mibisita si Kim sa China niadtong 2019 atol sa ika-70 anibersaryo sa diplomatikong relasyon tali sa North Korea ug China.
Ang bag-ong pagbisita nagpakita sa padayon nga panag-uban tali sa Pyongyang ug Beijing. Sumala sa mga analista, gilauman nga gamiton ni Kim Jong Un ang maong panagtigom aron palig-onon ang relasyon sa iyang mga kaalyado ug ipakita ang suporta tali sa mga nasud nga adunay kontra sa impluwensya sa Estados Unidos ug Western allies.
Photo courtesy to:anews
