Giduso ni Senador Ronald “Bato” Dela Rosa ang pagbalik sa silot-kamatayon alang sa mga opisyal sa gobyerno ug mga indibidwal nga mapamatud-an nga sad-an sa plunder o pandarambong.
Ubos sa Senate Bill No. 1343, gisugyot ni Dela Rosa nga amyendahan ang Republic Act No. 9346, ang balaod nga nag-abolish sa death penalty sa Pilipinas, aron ibalik ang pinakabug-at nga silot batok sa mga nalambigit sa pagpangurakot.
Ang lethal injection ang gisuportahang paagi sa silot-kamatayon. Gipunting sa senador nga ang pagkalambigit sa mga kurakot nga opisyal sa mga anomaliya sa flood control projects nga gibutyag mismo ni Presidente Ferdinand Marcos Jr. usa ka klaro nga ebidensya sa lapad nga korapsyon sa gobyerno.
Base sa datos gikan sa Department of Finance, gibanabana nga P42.3 bilyon hangtod P118.5 bilyon ang nawala sa ekonomiya matag tuig tungod sa korapsyon sa mga proyektong flood control gikan 2023 hangtod 2025.
Giingon nga katumbas kini sa pagkawala sa 95,000 hangtod 266,000 ka trabaho nga unta mahimo alang sa mga Pilipino.
Gibutyag usab nga adunay “kickback scheme” diin hangtod 30 porsiyento sa kantidad sa proyekto ang maadto sa mga politiko nga giingong utok sa anomaliya, samtang ang nahabilin nga porsiyento gibahin-bahin sa mga opisyal sa Department of Public Works and Highways (DPWH), contractors, district engineers, ug auditor.
Sumala ni Dela Rosa, dili igo ang pagkabilanggo lang isip silot sa ingon niini nga matang sa krimen nga mokutlo sa kahigayonan sa mga lungsuranon nga makabaton og maayong pagpuyo.
Giingon niya nga ang mga kurakot nga opisyal nga mipili sa pagpadato sa ilang kaugalingon taliwala sa kalisud sa kadaghanan kinahanglan manubag sa silot.
Photo courtesy to: Human Right watch
