Masaksihan ang gitawag nga “Blood Moon” sa umaabot nga gabii sa adlaw’ng Dominggo atol sa usa ka total lunar eclipse nga makita sa tibuok Asya ug sa pipila ka bahin sa Uropa ug Aprika.
Mahitabo ang total lunar eclipse kung ang adlaw, yuta, ug buwan maglinya. Ang anino sa yuta nga motabon sa buwan mohatag niini og mangitngit ug pula nga kolor, usa ka talan-awon nga nakadani sa mga tawo sulod sa liboan ka tuig.
Sumala pa ni Ryan Milligan, usa ka astrophysicist gikan sa Northern Ireland’s Queen’s University Belfast, nga ang buwan mopula atol sa lunar eclipse tungod kay ang bugtong kahayag sa adlaw nga makaabot niini kay “nireflect ug nagkatag sa atmospera sa yuta.”
Matod niya, ang asul nga wavelengths sa kahayag mas mubo kay sa pula, busa mas dali kini mapakatag samtang moagi sa atmospera sa yuta, kini ang hinungdan sa “pula ug murag dugo nga kolor sa buwan.”
Ang mga tawo sa Asya, lakip na ang India ug China,ang makasaksi sa total eclipse karong Dominggo. Makita usab kini sa sidlakang bahin sa Africa ug sa kasadpang Australia. Ang total lunar eclipse molungtad gikan sa alas-5:30 sa hapon hangtod sa alas-6:52 sa sayo nga gabii.
Photo courtesy to: Beautiful Nature
