Gisugdan na ni Cuban President Miguel Diaz-Canel ang iyang state visit sa Asia, lakip ang mga nasod nga Vietnam, China ug Laos nga gilangkuban isip suod nga kaalyado sa komersyo ug kasaysayan sa panag-uban. Ang iyang biyahe natala samtang nagpadayon ang grabe nga krisis pang-ekonomiya sa Cuba nga adunay kapin 10.9 milyones nga katawhan, ug samtang naapektohan usab ang kalibutang patigayon tungod sa taripa nga gipahamtang sa Estados Unidos.
Sumala ni Diaz-Canel, iyang gihulagway ang tulo ka nasod nga igsoon sa panag-uban ug kooperasyon. Ang Vietnam naila nga nag-unang investor sa Cuba, diin ang bilateral trade miabot og kapin $340 milyon sukad 2020. Lakip sa gi-eksport sa Vietnam mao ang bugas, uling, kemikal, panapton ug electronic parts, samtang ang Cuba nag-eksport og produktong parmasyutiko.
Gidugang pa nga bag-ohay lang gitugotan sa Cuba ang Vietnamese firm nga Agri VAM sa pagpanguma og bugas sa 1,000 ka ektarya sa kasadpan sa Havana unang higayon nga usa ka pribadong kompanya nakasulod sa ingon nga pag-uma. Ang bugas gihulagway nga usa sa nag-unang pagkaon sa mga Cubano, nga mokaon og kasagaran 60 kilos matag tuig.
Photo courtesy to: CUBAMINREX
