Gipirmahan ni Senate President Francis “Chiz” Escudero ang mga subpoena alang sa walo ka construction companies nga napakyas sa pagpadala sa ilang mga representante sa nagpadayong imbestigasyon sa Senado sa mga anomaliya sa mga flood control projects sa gobyerno.
Ang mga subpoena ipadala karong adlawa ngadto sa mga kompaniya nga napakyas sa pagtambong sa Senate Blue Ribbon Committee hearing. Lakip niini ang Wawao Builders, Topnotch Catalyst Builders Inc., Sunwest Inc., St. Timothy Construction Corp., Royal Crown Monarch Construction & Supplies Corp., L.R. Tiqui Builders Inc., Hi-Tone Construction & Development Corp., ug Alpha & Omega General Contractor & Development Corp.
Ang maong lakang nunot sa direktiba ni Presidente Ferdinand Marcos Jr. nga pakusgon pa ang imbestigasyon sa giingong anomalosong paggasto nga P545 bilyones alang sa flood control projects sa nagkadaiyang dapit sa nasod.
Sumala sa inisyal nga mga taho, 15 ka kompanya sa konstruksiyon ang nakadawat ug dakong bahin niini nga kantidad ubos sa mga kontrata sa gobyerno.
Giklaro ni Escudero nga ang imbestigasyon gitumong sa pagsuta kon duna bay mga iregularidad sa pagpili sa mga kontraktor ug epektibo ba ang pagpatuman sa mga proyekto.
Ang Senate Blue Ribbon Committee gilauman nga ipadayon ang sunod nga pagdungog sa umaabot nga mga semana, diin ang presensya sa mga kompanya nga gipadala sa ilawom sa subpoena gilauman.
via: Senate of the Philippines
