Nihangyo sa Department of Transportation (DOTr) ang Trade Union Congress of the Philippines (TUCP) party list sa pag-igo sa preno ug unahon ang pagpaubos sa plitehan imbes nga doblehon kini, nunot sa takdang ipasaka sunod buwan ang terminal fees sa main gateway sa nasod.
Kini human mismong si Transport Secretary Vince Dizon midepensa sa usbaw, nga nagkanayon nga kabahin kini sa concession agreement sa New NAIA Infra Corp.
Atol sa pamahayag sa Trade Union Congress of the Philippines niadtong Sabado, nga gisiguro ni Dizon nga ang serbisyo sa NAIA mouswag ug nahimong mas episyente sa dili pa aprobahan ang pag-usbaw niini.
Gibutyag ni TUCP party-list Rep. Raymond Mendoza nga daghang Pilipino ang naglisod sa ekonomiya ug ang pagpaubos sa bayronon ug plitehan maoy patas nga lakang.
Motaas ang terminal fee sa NAIA karong Septiyembre 14, eksaktong tuig sukad ang NNIC mipuli sa mga operasyon sa tugpahanan. Sa departing international flights, ang bayronon mosaka sa P950 gikan sa P550; samtang ang domestic flight terminal fee hapit modoble ngadto sa P390 gikan sa P200 matag pasahero.
Nanawagan si Mendoza sa DOTr nga mosimpatiya sa mga trabahante kansang sweldo igo lang ipakaon sa ilang mga pamilya.
Gisugyot sa party-list ning semanaha ang 50-porsiyento nga diskwento sa plitehan sa Light Railr Transit-1, LRT-2 ug Metro Rail Transit-3.
Gipahinumdoman ni Mendoza ang DOTr nga ang “serbisyo publiko” magpasabot nga unahon ang interes sa ordinaryong mga trabahanteng Pilipino kaysa interes sa pribadong mga kompaniya.
Matod niya nga sayon ra ang pag-verify nga ang usa ka pasahero usa ka minimum-wage earner pinaagi sa certificates of employment ug payslips.
Una nang gipahayag sa TUCP nga ang mga trabahante sa minimum nga suholan mabiyaan sa 50-porsiyento nga diskwento sa pletehan sa gobyerno alang sa mga estudyante, persons with disabilities (PWDs), ug senior citizens.
photo courtesy:abs cbn.avif
