Nanawagan si Senador Benigno “Bam” Aquino nga tukion og maayo ang paggasto sa Department of Public Works and Highways (DPWH) nga nagkantidad og kapin P360 bilyones alang sa flood control karong tuiga, taliwala sa nagpadayong mga problema sa pagbaha sa pipila ka bahin sa nasud.
Sa gisang-at nga resolusyon, giawhag ni Aquino ang mga komite sa Senado sa paghimo og imbestigasyon aron masuta kon epektibo ba ang mga proyekto sa DPWH ug ang pundo paingon sa hustong mga dapit.
Matud sa magbabalaod, gikan sa 2009 hangtod 2024, niabot na sa P1.47 trilyon ang kinatibuk-ang budget control sa baha, apan daghang komunidad ang nagpabiling bulnerable sa pagbaha.
Gawas sa resolusyon, nitumaw usab ang mga pahayag sa giingong peke nga flood control projects nga mipabor sa mga piling kontraktor.
Sa managlahing imbestigasyon sa Senate Blue Ribbon Committee gisuta ang halos P100 bilyones nga kantidad sa mga proyekto nga posibleng adunay mga anomaliya, lakip na ang mga proyekto nga wala mahuman, dili kinahanglan, o balikbalik na sa samang lugar.
Gitumbok ni Aquino ang kamahinungdanon sa transparency ug accountability sa paggasto sa mga pundo, ilabi na kang epekto sa pagbaha direktang mabati sa mga lungsoranon gikan sa pagkadaot sa kabtangan ngadto sa mga delikadong kahimtang sa kinabuhi.
Gilauman nga hisgutan sa Senado ang resolusyon sa sunod nga sesyon, gumikan sa nagpadayon ang pag-ulan ug pagbaha sa daghang mga rehiyon sulod sa nasud.
Photo Courtesy: Senate of the Philippines
