Gituki sa pagdungog sa Committee on Agriculture, Food and Agrarian Reform nga gipangulohan ni Senator Francis “Kiko” Pangilinan uban nila Sen. Rodante Marcoleta ug Sen. Imee Marcos isip mga Vice Chairperson sa maong komite.
Sa maong panagpulong, namatikdan ni Pangilinan ang pagsaka sa presyo sa mga basic commodities karong tuiga kung itandi sa tuig 2018.
Halos mokabat sa 50% ang pag-usbaw sa presyo sa mga nag-unang palaliton sama sa karneng baboy, kamatis, sibuyas ug bugas.
Matod pa ni Pangilinan, tumong sa ilang pagdungog ang paghisgot sa mga problema nga giatubang sa agriculture sector nga giila nga hinungdan sa pag-usbaw sa presyo sa mga baligya sa merkado.
Samtang si Marcoleta, namahayag nga daghan na og mga balaod ang napasa sa kongreso nga mapuslan unta sa agriculture sector kung matarong lang kini nga ipatuman ug masiguro ang husto nga implementasyon.
Gipasabot niini nga mas mahimong epektibo ang paggamit sa pondo o loans alang sa lokal nga mga mag-uuma kung mahan-ay ang pagtuman sa mga balaod nga napasa na bahin niini.
Busa, gihingusgan ni Marcoleta nga layo pa ang Pilipinas sa gitawag nga food security, ug bisan sa food sufficiency naglisod gihapon ang sektor sa agrikultura sa nasod.
via: Bea Peniza
