Balhog sa prisohan si kanhi First Lady Kim human gipagawas sa korte ang mando sa iyang pagdakop, nga nagpasamot sa iyang kalisod sa balaod samtang ang iyang bana nga si kanhi Presidente Yoon Suk Yeol nag-atubang usab sa kaso sa insurrection ug abuso sa gahom.
Gipasakaan si Kim sa kasong stock fraud, panuhol (bribery) ug iligal nga paggamit sa impluwensya, nga nalambigit sa mga negosyante, lider relihiyoso ug usa ka political power broker.
Usa sa mga pasangil mao ang pagsul-ob niya og mahalon nga Van Cleef pendant nga gitaho nga nagkantidad og kapin β©60 milyon ($43,000) sa NATO summit niadtong 2022, nga wala giapil sa ilang financial disclosure sumala sa balaod.
Lakip sa mga pasangil mao usab ang pagdawat og duha ka Chanel nga bag nga nagkantidad β©20 milyon ug usa ka diamond necklace gikan sa usa ka grupo sa relihiyon bugti sa pabor sa ilang negosyo.
Matod sa espesyal nga piskal, giduso ang pagdakop tungod sa risgo nga iyang hanawon ang ebidensya. Gibutyag ni Kim nga ang pendant usa ka peke nga gipalit niya sa Hong Kong kapin duha ka dekada na ang milabay, apan gibarugan sa piskalya nga tinuod kini ug gihatag sa usa ka domestic construction company.
Samtang padayon ang imbestigasyon, si Yoon nagpadayon sa pagdumili sa pag-apil sa mga pagdungog sa korte, samtang nag-atubang sa posibleng kinabuhi nga pagkabilanggo o silot nga kamatayon.
via: Amy Sood
photo credits:newswire.lk
