Gibalhin sa gobyerno sa Mexico ngadto sa awtoridad sa Estados Unidos ang 26 ka lider ug miyembro sa kartel sa droga Martes, ilawom sa kasabutan uban sa administrasyon ni Donald Trump.
Lakip sa mga gi-turn over si Abigael González Valencia sa “Los Cuinis” nga kaalyado sa Jalisco New Generation Cartel (CJNG), ug si Roberto Salazar nga gipasanginlan sa pagpatay sa usa ka sheriff’s deputy sa Los Angeles kaniadtong 2008.
Ang uban pang naapil adunay kalambigitan sa Sinaloa Cartel ug ubang grupong sangkot sa pagpamaligya ug pagpuslit og droga. Sumala sa US Attorney General Pam Bondi, ang mga dinakpan adunay dakong papel sa pagdala sa droga ug kasamok sa US ug atubangon ang bug-at nga silot.
Gitugotan ang pagbalhin human mosugot ang US nga dili mangayo og death penalty batok sa mga akusado, sama sa kasabutan sa milabay nga Pebrero sa pag-turn over sa 29 ka miyembro sa kartel, lakip na si drug lord Rafael Caro Quintero.
