Giila sa kampo ni Vice President Sara Duterte ang desisyon sa Senado nga mosunod sa mando sa Korte Suprema, pinaagi sa pag-archive o pagpadaplin sa Articles of Impeachment batok kaniya.
Matod ni Atty. Michael Poa, tigpamaba sa Office of the Vice President, nakatutok na karon ang ilang buhatan sa pagsumite sa komento kabahin sa motion for reconsideration, nga gisang-at sa House of Representatives, nga naglantaw nga marepaso ang desisyon sa Supreme Court.
Sa resulta sa boto sa Senado, 19 ka mga senador ang mipabor nga ipadaplin una ang impeachment complaint, upat ang supak, ug usa ang nag-abstain.
Kahinumdoman nga niadtong Hulyo 25, 2025 nagpagawas og desisyon ang Supreme Court nga ibasura ang impeachment complaint batok sa Bise Presidente, tungod kay nakalapas kini sa constitutional limitation, diin giingon nga usa ra ka reklamo ang tugutan sulod sa usa ka tuig.
Sa laing bahin, gipasabot usab ni Poa nga samtang nagapadayon ang legal nga proseso, ang buhatan sa Bise Presidente magpadayon gihapon sa pagserbisyo ug pagpaningkamot sa ilang mga programa alang sa katawhang Pilipino.
