KIDAPAWAN CITY- Patay ang usa ka estudyante samtang angol usab ang duha ka rescuer human kining nabanggaan sa motorista nga nakainom sa ilimnong makahubog sa Purok 5B, Brgy. Sudapin, Kidapawan City atubangan sa San Miguel Stock Building, ala 1:24 sa kadlawon niadtong nakalabay nga adlaw.
Sa report sa Kidapawan City Police Station Traffic Section, samtang gasubay gikan sa Kidapawan paingon sa Magpet nga dalan ang usa ka Yamaha Mio Aerox, adunay plakang M222FF nga gimaneho ni Froilan Parcon Panagsagan, 22-anyos, estudyante, residente sa Poblacion, Magpet, North Cotabato, matud pa adunay nitabok nga iro hinungdan nga ni-apply kini og full brake aron malikayan kini apan nawalaan kini og kontrol nga miresulta sa iyang pagkatumba.
Nalagpot sa sementadong bahin ang driver lakip na iyang angkas hinungdan nga naangol ang duha ka indibidwal.
Dali usab sila nga gi-rescue sa 911 Kidapawan, apan samtang gina-rescue ang biktima, usa ka motorsiklong Euro 125 nga gimaneho ni Carlos Dapan Guabong Jr., 36-anyos, residente sa Purok Lanzones, Brgy. Manongol, Kidapawan City, nga lango sa ilimnong makahubog ang nipahaguros sa pagpadagan og kalit nga nibangga sa mga nahisgutan.
Gidala sa Kidapawan Medical Specialist Center ang duha ka rescuer nga naangol nga sila Arvyn Omandac, 33-anyos, residente sa Purok 5A, Brgy. Sudapin ug usa ka Aleah Barredo, 37-anyos, residente sa Purok 4B, Lanao sa nahisgutang syudad alang sa atensyong medical, samtang gidala usab sa Madonna Hospital si Panagsagan apan gideklarang kining patay tungod sa severe head injury.
Samtang balhog na sa Kidapawan City Custodial Facility ang suspetsado, samtang anaa na usab sa buhatan sa kapulisan ang duha ka motorsiklong nalambigit sa disgrasya alang sa tukmang disposisyon.
