Mitabang sa Pilipinas ang tulo ka nasud aron matabangan ang siyam ka mga Pilipinong seafarers nga gigunitan sa rebeldeng grupo nga Houthis didto sa Yemen.
Sumala ni Foreign Affairs Undersecretary Eduardo de Vega, ang Saudi Arabia, Oman, ug Bahrain ang aktibong naningkamot sa pagtabang sa negosasyon alang sa ilang kaluwasan.
Tungod sa ilang suporta, napadali ang pakig-koordinar sa Philippine Honorary Consulate sa Sanaa, Yemen, ug mas natutukan ang kahimtang sa mga Pilipinong tripulante nga anaa sa poder sa mga rebelde.
Gilauman nga mapadali ang ilang pagluwas ug ang pagpadala og tabang humanitarian. Gisiguro usab sa Department of Foreign Affairs (DFA) nga padayon ang ilang pakigtambayayong sa mga internasyonal nga organisasyon sama sa United Nations aron malikayan ang mas grabe pang insidente.
Giawhag sab ang mga pamilya sa mga biktima nga magpadayon sa pag-ampo ug pagsalig samtang gibuhat sa gobyerno ang tanang lakang para sa luwas nga pagpauli sa mga seafarers.
