PAGADIAN CITY- Pito ka mga indibidwal lakip na ang pasyente ang naka-angkon ug samad ug bun-og sa lawas human nabalintong ang ilang gisakyan nga rescue vehicle sa may Purok Piña, Barangay Makuguihon, Molave, Zamboanga del Sur, Hulyo 31, 2025.
Ang maong behikulo gipanag-iyaha sa Provincial Government sa Misamis Occidental nga gimaneho sa usa ka alyas Ale, 62 anyos, ug gikatahong nagkarga ug 71 anyos, nga pasyente ug lima ka laing kaubanan nga pulos lumulupyo sa Barangay Tuno, Don Victoriano, Misamis Occidental.
Sa imbestigasyon sa kapulisan, ang maong behikulo nagbyahe paingon sa Blancia Hospital sa Molave, apan sa kalit lang nawad-an sa control ang driver sa kurbadahong bahin hinungdan kini nabalintong.
Dali nga miresponde ang Molave Municipal Disaster Risks Reduction and Management Office (MDRRMO) ug Bureau of Fire Protection (BFP) personnel sa dapit nahitabuan ug gidala ang tanang pasyente sa Salug Valley Medical Center sa Barangay Madasigon alang sa dinaliang medikasyon.
