PAGADIAN CITY- Duha ang nakabsan sa kinabuhi sa natigayong ngilngig nga disgrasya nga naglambigit sa usa ka single motor sa may Purok Sili 3, Barangay Balintawak, Pagadian City, karong hapon, August 01, 2025.
Sa nakuhang kasayuran sa Juander Radyo News Team, usa sa mga biktimang driver nga nailang si Stanley Abrea nagtungha sa Saint Columban College, samtang ang duha ka babaye nga nailang sila si Zaipoden Tiffany ug Junalyn Oliva, pulos studyante sa Zamboanga del Sur National Highschool.
Gikan matud pa ang mga biktima sa usa sa mga “laaganan” sa Barangay Palpalan, Pagadian City apan sa dihang sila pauli na kalit nawad-an ug brake ang ilang single motor nga gisakyan, hinungdan nawad-an ug control ang driver ug milahos ug bangga sa usa ka panimalay.
Usa ang nadeklara nga dead on the spot, samtang ang driver ug ang laing usa ka biktimang babaye nadala pa sa tambalanan apan gideklara usab nga dead on arrival sa miatimang doctor ang babayeng biktima.
Naglusad na ug imbestigasyon ang kapulisan aron masuta ang hinungdan sa panghitabo ug anaa na usab sa ilang kustudiya ang single motor nga nalambigit sa panghitabo.
