MALAYBALAY CITY- Kutob nalang sa pagdangoyngoy ug paghilak ang pamilya ug mga kabanay human wala natabang ug nakabsan sa kinabuhi ang usa ka lalaki nga napaakan sa iladong malalang King Cobra, didto sa Sitio Kisayab, Bonacao, San Fernando niadtong nakalabay nga adlaw. Giila ang biktimang lalaki lumolupyo sa nahisgutang lugar kinsa amahan sa duha ka gagmayng mga bata.
Base sa inisyal nga report, samtang anaa ang biktima sa trabahuan, wala niini damha nga aduna diay dakong bitin o king cobra nga nakapaak kaniya hinungdan sa hinanaling kamatayon niini.
Dismayado karon ang pamilya ug ubang katawhan sa maong dapit tungod kay hangtod karon, wala pa gihapoy konkretong aksyon gikan sa mga opisyal sa gobyerno kabahin sa pag-andam ug paghatag og anti-venom sa mga hospital.
Panawagan sa pamilya nga hatagan og prayoridad ang pagplano ug pagpatuman sa mga insaktong lakang aron malikayan ang susama nga trahedya sa umaabot.
Via: MaestroNap Mansaloon
