Gipasalamatan sa Department of Social Welfare and Development (DSWD) si Philippine National Police (PNP) Chief Gen. Nicolas Torre III sa donasyon nga kapin sa P16 milyones gikan sa “Boxing for a Cause: Laban sa Nasalanta” nga gipahigayon sa Rizal Memorial Coliseum sa Manila.
Matod ni DSWD Assistant Secretary ug spokesperson Irene Dumlao, ang dakong kantidad makatabang sa minilyon ka pamilya nga apektado sa habagat ug uban pang kalamidad.
Nasayran nga ang boxing match nga gipasiugdahan sa PNP ug gidaogan ni Gen. Torre pinaagi sa default win, nakatigom og kapin sa P300,000 gikan sa entrance fee ug dugang P16 milyones gikan sa mga donasyon. Ang kinatibuk-ang kantidad gikatakdang i-turn over sa DSWD karong semanaha.
Samtang, ang kinatibuk-ang hinabang nga gipang-apod-apod sa DSWD ngadto sa mga apektadong indibidwal ug pamilya niabot na sa P293 milyones sukad niadtong Hulyo 26, 2025.
Source: Jhon flores
