TAGUM CITY – Gihaya na sa usa ka punerarya ang patayβng lawas sa 19-anyos nga dalaga nga si alyas Sophie, kinsa gipatay niadtong Hulyo 9, 2025 sa ila mismong pinuy-anan sa Prk.3A, Brgy. La Filipina, Tagum City, Davao del Norte. Naka-angkon matud pa ang biktima og dili moubos sa 38 ka samad dinunggaban sa iyang lawas subay kini sa pagsusi sa SOCO.
Nadakpan na ang duha sa upat ka mga suspek kinsa nagpangidaron og 14 anyos ug 17 anyos, nga gipaningkamutang masikop sa hiniusang operasyon sa Tagum City POLICE Station katambayayong ang Davao Norte Police Provincial Office (DNPPO) ala-una pasado sa kadlawon Hulyo 10, 2025.
Sa pagpanubay sa Juander Radyo News Team sa estasyon sa kapulisan sa dakbayan, gibutyag sa duha ka suspek nga nakamata matud pa ang biktima dihang gihimo nila ang pagpangawat sulod sa kwarto niini. Matud pa, gumikan sa ilang kahadlok nga masakpan ug isumbong sa awtoridad, nabuhat nila ang mangilngig nga pagpatay sa maong dalaga.
Samtang sa pikas bahin, una paman nahitabo ang insedente nakuhaan pa ang mga suspetsado sa CCTV sa maong lugar sa ilang gihimo nga surveillance duha ka adlaw ayha gihimo nila ang krimen.
Anaa na sa kustodiya sa Tagum City Police Station ang duha ka mga dinakpan samtang posibleng i-turnover sila ngadto sa Women and Children’s Protection Desk (WCPD) sa maong estasyon. Sa pagkakaron gipahugtan pa ang gihimong hot pursuit operation sa kapulisan alang sa hinanaling pagsikop sa duha ka nakasibat nga mga suspetsado.
