Gikumpirma ni US President Donald Trump ang pag-aprubar sa kapin 5-bilyong dolyar nga kantidad sa mga armas alang sa Pilipinas, taliwala sa nagpadayon nga pagpalig-on sa kooperasyong pangdepensa sa duha ka nasod. Gipahibalo kini ni Trump atol sa iyang pakighimamat kang Presidente Ferdinand Marcos Jr. sa Malacañang niadtong Miyerkules.
Matud ni Trump, dugangan usab sa US ang pondo alang sa military financing sa Pilipinas aron mapalambo ang kapasidad sa nasod sa pagpanalipod sa teritoryo.
Gibutyag usab sa US President ang pagtukod og 21 ka pasilidad sa ilang nasod aron mapadali ang paghimo sa mga kagamitan sa militar ug mapamub-an ang panahon sa paghulat sa mga kaalyado.
Apan wala pa niya hinganli ang mga armas nga sakop sa maong kasabutan o ang gidaghanon niini nga nadeliber na.
Samtang, gipasiugda ni Marcos ang dugay nang alyansa sa duha ka nasod ilabi na sa pagsaulog sa ika-75 nga anibersaryo sa Mutual Defense Treaty.
Photo courtesy: x.com










