Pormal nang gisugdan niadtong Nobyembre 20, 2026 ang katukuran ug rehabilitasyon sa ₱600-milyon nga Valencia City Good Samaritan General Hospital (VCGSGH) pinaagi sa usa ka groundbreaking ceremony sa New Terminal Complex, Barangay Poblacion, Valencia City, Bukidnon.
Ang maong pondo gamiton alang sa konstruksyon, modernong mga ekipo, ug start-up operations sa pasilidad nga target makaabot og halos 100 ka bed capacity ug makatanyag og zero balance billing alang sa mga kwalipikadong pasyente.
Kung mahuman na kini—nga gilauman sa Agosto 2027 sumala pa ni Vice Mayor Greizl Galario-Fernandez—moakomodar na ang ospital og unom ka ICU beds, laboratoryo, CT scan, MRI, ug uban pang espesyal nga serbisyong medikal.
Samtang nagpadayon ang konstruksyon, temporaryong ibalhin ang mga serbisyong medikal sa hospital sugod karong Nobyembre 23, 2026 ngadto sa City Hall Complex (Dayong Building, Brgy. Poblacion) matag Lunes, Martes, Huwebes, ug Biyernes, ug sa Laligan Super Health Center matag Martes ug Huwebes.
Photo courtesy:LGU – Valencia City










