Nakabalik na sa nasod si Presidente Ferdinand Marcos Jr. ug Unang Ginang Liza Araneta-Marcos Biyernes sa gabii, Nobyembre 20, 2026, human sa ilang tulo ka adlaw nga pagbisita sa Shenzhen, China alang sa 33rd Asia-Pacific Economic Cooperation (APEC) Economic Leaders’ Meeting.
Atol sa maong summit,nasaksihan sa Presidente ang pagpirma sa Philippines–Chile Comprehensive Economic Partnership Agreement (CEPA) uban ni Chilean President José Antonio Kast—usa ka makasaysayanong kasabutan isip labing unang bilateral free trade agreement sa Pilipinas uban sa usa ka nasud sa Latin America—samtang gipahigayon usab niya ang mga bilateral meetings uban sa mga lider sa Vietnam, Mexico, ug New Zealand,lakip na ang mubo nga paglamano uban ni Chinese President Xi Jinping bisan pa sa tensyon tali sa Manila ug Beijing.
Sa iyang mensahe sa pag-abot sa Villamor Air Base sa Pasay City, gibutyag ni Marcos nga iyang gipahimuslan ang forum aron makakuha og konkretong benepisyo sa ekonomiya ug dugang trabaho alang sa mga Pilipino, lakip na ang pagpakigtagbo sa mga ehekutibo sa mga kompanya sa China alang sa posibleng negosyo ug pamuhunan. Sa iyang pamahayag atubangan sa mga lider sa APEC, giduso usab sa Presidente ang mas lig-on nga panag-uban sa rehiyon, bukas nga merkado, lig-on nga supply chains, ug ang pagsumpo sa ilegal nga pangisda, samtang gipasiugda ang bag-ong nahuman nga ASEAN Digital Economy Framework Agreement.
Photo courtesy: APEC/PCO










