Nagpahigayon og duha ka adlaw nga Coaching, Counseling, and Mentoring (CCM) Activity ang 60th Infantry (Mediator) Battalion pinaagi sa Mediator PAGLAUM Program niadtong Nobyembre 14 hangtod 15, 2026, sa Tatag IP Tourism Center, Barangay Sto. Niño, Talaingod, Davao del Norte. Nakapahimulos sa maong kalihokan ang 18 ka scholars sa Tatag IP Students Foundation Inc. (TIPFSI).
Pinaagi sa temang “Aral at Saya: A Learning Adventure,” gilakip sa programa ang nagkalain-laing educational games, teamwork activities ug mentoring sessions aron mapalambo ang pagsalig sa kaugalingon, pagkamamugnaon, maayong pamatasan ug pagpasigarbo sa ilang kultura isip lumad.
Lakip usab sa mga kalihokan ang paghisgot sa ilang mga pangandoy, pag-ila sa ilang potensyal ug pagpalig-on sa ilang pagtuo pinaagi sa pag-ampo, worship songs ug bonfire fellowship.
Gisuportahan usab ang kalihokan sa Cebuana Lhuillier ug ubang mga kaabag ug benefactors nga naghatag og mga gasa ug suporta alang sa mga scholar.
Matod sa 60IB, pinaagi sa Mediator PAGLAUM Program, ilang ipadayon ang paghatag og kahigayonan sa kabatan-onang lumad nga makakat-on, molambo ug makab-ot ang ilang mga pangandoy isip kabahin sa pagpalig-on sa komunidad ug malinawon nga kaugmaon.
Photo Courtesy: 60th Infantry “Mediator” Battalion










