Katorse ka magkapareha ang magapakasal nga libre sa idalom sang Kasalan ng Bayan sa Pasko 2026 nga ipatigayon sa Disyembre 18, 2026 sa City Cultural and Sports Center, Tacurong City. Ang nasambit nga magkapareha nga nagkwalipikar sa programa naghalin sa Nuestra Señora de la Candelaria Parish.
Bilang preparasyon, nagpatigayon ang City Government sang Tacurong, pinaagi sa Office of the City Civil Registry, sang Church Wedding Orientation kag POPCOM Seminar sang Nobyembre 18 agud talakayon ang mga kinahanglanon kag proseso sang kasal.
Samtang, pagasabton sang syudad ang bayad sa CENOMAR, Pre-Cana Seminar, kasal sa simbahan kag duha ka wedding sponsors. Makabaton man ang tagsa ka magkapareha sang libre nga wedding cake kag photo frame nga may litrato nila sa kasal.
Pinaagi sa sini nga programa, ginatinguhaan sang lokal nga panguluhan nga mabuligan ang mga magkapareha nga mapormal ang ila pag-asawahay nga wala na kinahanglan mag-abaga sang pipila ka gasto sa kasal.
Photo courtesy: City Government of Tacurong










