Gipasiugdahan sa People’s Administration, pinaagi sa pagpanguna sa City Social Welfare and Development Office (CSWDO), ang Kiddie Fair 2026 nga gipahigayon sa MFGR Park and Baywalk isip kabahin sa pagsaulog sa ika-34 nga National Children’s Month. Tumong sa kalihokan nga ipakita ug mapalambo ang talento, abilidad ug kaayohan sa mga kabataan sa dakbayan sa Mati.
Pinaagi sa maong kalihokan, gihatagan og higayon ang mga batang Matinian nga mapadayag ang ilang mga talento ug makigbahin sa nagkalain-laing kalihokan nga nagtumong sa pagpalambo sa ilang kaugalingong abilidad. Gipakita usab niini ang kamahinungdanon sa paghatag og luwas, malipayon ug mapalamboong palibot alang sa matag bata.
Dugang pa niini, gipadayag sa lokal nga panggamhanan ang padayon nga dedikasyon sa pagpanalipod ug pagsuporta sa mga katungod ug kaayohan sa kabataan, ilabina human mailhan ang Mati niadtong Oktubre isip 2025 Presidential Awardee for Child-Friendly City.
Kini nga pag-ila nagsilbing pamatuod sa makanunayong paningkamot sa administrasyon aron masiguro ang mas maayong kaugmaon alang sa tanang batang Matinian.
Photo courtesy: LGU Mati










