Magtagana ug mokabat sa P497 milyon ang Provincial Government of Zamboanga del Sur alang sa napulo ka tuig nga programa sa pagdumala sa basura gikan sa 2026 hangtod 2035.
Kini human gipagawas ang Executive Order No. 17, Series of 2026 nga gipirmahan ni Governor Divina Grace C. Yu pinaagi usab sa Provincial Solid Waste Management Board (PSWMB).
Matud ni Provincial Board Member Hernan “Nanding” Dela Cruz, nga maoy chairman sa Committee on Environment and Natural Resources sa Sangguniang Panlalawigan, ang pagpatuman sa program gibahin sa tulo ka hugna.
Sa unang hugna gikan 2026 hangtod 2028, tutukan ang pag-apruba sa plano, pagpalig-on sa mga institusyon, pagtukod og sanitary landfill ug pagsugod sa pilot materials recovery facilities.
Sa ikaduhang hugna gikan 2029 hangtod 2031, ipatukod ang mga pasilidad sa pag-recover sa basura ug mga eco-park sa matag lungsod. Samtang sa katapusang hugna gikan 2032 hangtod 2035, tumong nga hingpit nang mapalihok ang provincial ug clustered waste management facilities.
Sa kinatibuk-ang P497 milyong pondo, P260 milyon ang igahin alang sa pagtukod og sanitary landfill, P130 milyon alang sa suporta sa mga institusyon ug pagpalambo sa kapasidad, P52 milyon alang sa municipal eco-parks, P35 milyon alang sa mga estratehiya sa pagpakunhod ug pagproseso sa basura, ug P20 milyon alang sa pagtukod og provincial eco-park.
Lakip sa mga estratehiya ang hustong paglain-lain sa basura, pag-compost, pag-recycle ug pagpalig-on sa kampanya sa kahibalo sa publiko aron maminusan ang basura nga madala sa mga disposal facilities.
Tumong sa maong programa nga mapalig-on ang panag-alayon sa probinsyal ug lokal nga panggamhanan, mga ahensya sa gobyerno ug komunidad alang sa mas limpyo ug mas himsog nga palibot.










