Gipakusgan sa National Meat Inspection Service o NMIS Caraga ang kampanya batok sa pagbaligya og karne nga dili luwas konsumohon pinaagi sa paglusad sa programang “OPLAN PASKO NA! – BANTAY KARNE” isip pagpangandam sa nagkaduol nga Pasko ug Bag-ong Tuig.
Pinaagi niini, giawhag sa NMIS Caraga, ubos sa pagpanguna ni Regional Technical Director Dr. Angelita E. Barcelona, ang tanang lokal nga kagamhanan sa rehiyon nga hugtan ang pagmonitor ug inspeksyon sa mga karne nga gibaligya sa merkado, ihawan ug mga tindahan.
Lakip sa tutukan sa kampanya ang hustong pag-inspeksyon sa mga hayop sa wala pa ug human ihawon, pagmonitor sa transportasyon ug temperatura sa karne, ingon man ang pagsumpo sa iligal nga pag-ihaw ug pagbaligya og karne nga walay saktong inspeksyon.
Gikatakdang ipahigayon ang kampanya sugod Disyembre 1, 2026 hangtod Enero 5, 2027 aron masiguro nga ang mga karne nga maabot sa mga konsumidor limpyo, presko ug luwas kan-on.
Gipasiugda usab ni Dr. Barcelona nga dili lamang responsibilidad sa NMIS ang kaluwasan sa karne, kondili hiniusang katungdanan kini sa lokal nga kagamhanan, industriya ug mga konsumidor.
Tumong sa maong kampanya nga malikayan ang posibleng sakit nga makuha gikan sa kontaminado o dili maayong pagdumala sa karne, ilabina karong panahon sa kapaskuhan diin kasagarang mosaka ang konsumo niini.










