Dali nga girespondehan sa kapulisan ang ilang nadawat nga emergency call pinaagi sa S.A.F.E. Eastern Visayas Dial 911 mahitungod sa duha ka indibidwal nga nasamdan human sila giingong gipanigbas og sundang didto sa Sitio Dapdap, Barangay Cabul-an, Capoocan, Leyte niadtong nakalabay nga adlaw.
Base sa report sa Leyte Police Provincial Office, nakita sa mga nirespondeng pulis ang duha ka biktima nga adunay mga samad sa daplin sa barangay road, hinungdan nga nakig-alayon sila sa Capoocan MDRRMO aron madala ang mga biktima sa Carigara District Hospital alang sa medikal nga pagtagad.
Pinaagi sa gilusad nga imbestigasyon ug pursuit operation, nadakpan ang giingong suspek nga giila lamang sa alyas nga “Mike,” diin narekober usab gikan kaniya ang usa ka sundang nga gidala sa Capoocan MPS alang sa dokumentasyon ug tukmang legal nga proseso.
Photo courtesy: Capoocan MPS










