Giaprubahan na sa Sangguniang Panlungsod sa Iligan City ang pagtukod sa Composite Command Center Team pinaagi sa ICDRRMC Resolution No. 9, Series of 2026, isip kabahin sa pagpalig-on sa pagpangandam ug pagresponde sa mga emerhensiya sa dakbayan.
Kalabot niini, nagpahigayon og coordination meeting ang nagkalain-laing ahensya sa gobyerno aron hisgutan ang pagpatuman sa maong resolusyon kagahapong adlawa Nobyembre 17, 2026.
Matod ni Armien P. Alorro, Head sa Iligan City Disaster Risk Reduction and Management Department (ICDRRMO) ang maong lakang nagtumong sa mas paspas nga pagpaambit sa impormasyon, episyenteng monitoring ug mas lig-on nga koordinasyon tali sa ICDRRMO, PNP-ICPO, CSU, CTMO, Task Force Iligan, Philippine Coast Guard, BFP ug uban pang ahensya.
Gipasabot ni Alorro, nga dili lamang kini gamiton panahon sa kalamidad ug dagkong kalihokan, kondili apil usab sa adlaw-adlaw nga operasyon aron masiguro ang kaluwasan, kahandam ug kalinaw sa dakbayan sa Iligan.










