Narekober sa kapulisan ang mokabat sa 450 ka litro nga diesel fuel human sa ilang pagtubag sa report kalabot sa gituohang walay otorisasyon nga pagdiskarga sa mga produktong petrolyo sa Purok Talisay, Barangay Kiambing, Maitum, Sarangani Province niadtong nakalabay nga adlaw.
Nadiskobrehan sa mga personahe sa 2nd Sarangani Provincial Mobile Force Company, SPPO Anti-Smuggling Team ug Maitum Municipal Police Station ang kinse ka sudlanan nga adunay sulod nga gibanabanang 450 ka litro nga diesel.
Apan, walay tawo nga ilang naabtan sa lugar nga makaila o moangkon sa pagpanag-iya sa maong mga produktong petrolyo.
Padayon ang imbestigasyon sa kapulisan aron matino kung kinsa ang responsable sa maong insidente ug mapalig-on ang kampanya batok sa ilegal nga pagdumala ug pagbiyahe sa mga produktong petrolyo.
Photo courtesy: PNP Secon Sarangani Provincial Mobile Force Company










